खिचडी, कढी आणि पापड: किनोवा

किनोवा - नाचणी डोसा

सुपर फूड म्हणून सध्या जगभर ज्याचा उदो उदो होत आहे तो किनोवा. त्याची किंमत बघूनच खरे तर मला धडकी भरली होती. तरीही या वर्षी दिवाळीत भावाकडून आलेल्या एका गिफ्ट पार्सल मध्ये किनोवा होता, ग्रीन टी आणि काही ड्रायफ्रूटस होते. इतके दिवस असेच गेले, किनोवाचे नक्की काय करावे या विचारात....अनेक रेसिपीज शोधून वाचून झाल्या होत्या मधल्या काळात, पण मुहूर्त काही लागेना!

काल अचानक सुचले.....

एक मूठ किनोवा, एक मूठ मूग डाळ, एक मूठ उडीद डाळ आणि एक मूठ तांदूळ भिजवून ठेवले. ५/६ तासांनी पाणी न घालता मिक्सर मधून वाटून घेतले. वाटतानाच त्यात एक वाटी नाचणीचे पीठ घातले.

रात्रभर उबदार जागी ठेवून सकाळी मीठ घालून सारखे करून त्याचे झटपट डोसे घालून चटणी सोबत सुंदर नाश्ता बनला.